Hestoria del Gochu Asturcelta

La coleutividá porcina que Sansón describíu como raza celta (suscelticus), correspuéndese con gochu dondu que remanez de la especie xabaz Sus scofra ferus.

Dende la dómina de los castros el gochu ta presente n’Asturies ya de continu apaez venceyáu como parte fundamental de la nuesa dieta a lo llargo de tola hestoria. Ufiertamos darréu una esbilla de delles referencies hestóriques valoratibles, ordenaes cronolóxicamente:

• Nel castru la Campa Torres (Xixón) atopánonse 766 restos de gochu, que pertenecen a 65 exemplares; otris 33 foron identificaos nel de Cellagú (Uviéu), lo que amuesa que’l porcín yera parte de la dieta castreña.

• Estrabón fálamos de los bonos perniles del gochu cantábricu, que faíen competencia a los de la Cerretania (La Cerdaña de güei).

• Nel documentu de fundación del Monesteriu d’Oubona (Tinéu), fecáu nel 780, apaecen nel so inventariu «duodecim porcos, et quatuor porcas».

• En 1604 nel Llibru Tumbo del Monesteriu de Balmonte (Miranda) al falar sobro los precios de los carneiros ya los gochos dizse: «... y las marranas [valen] ocho y nueve reales y cada día valdrán más. »

• Luis de Valdés nes sos Memorias de Asturias, espublizaes en 1622 diz: «Hai una caterma de xabariles ya, pelos montes ta llarao de gochos, criaos cola llande de carbayu ya castañes, por mor d elo cual ye sabrosísimo’l so tocín cocíu, porque ye freba, pero nun ya tan bonu pa lo asar, pos nun tien el gordor que’l de Castiella. »

• En 1711 Fray Toribio de Pumarada y Toyos, natural de La Riera, nel conceyu Colunga, escribe el tratáu xeopónimu tituláu Arte General de Grangerías. Nel so «Capítulo quarto» cinca la tema del porcín embaxo l’épigrafe «Grangería del Ganado Cerduno», llamando al gochu asturcelta como «lanudo» y «de la tierra». Diz asina:

«...debes tener cerdo de tres géneros. Castellanos finos, mestizos y lanudos aí de la tierra. Pero de todos nunca pases del número de cabezas que puedas bien sustentar, ya con las castañas, ya con el boruyo, ya con el fariellu, ya con el grano, etc. Y por más rico que te veas, nunca passes de dos castellanas finas parideras. Dos mestizas. Y quatro lanudas. » Fae encamientos tamién pa conseguir bonos gochos cruzaos, y alvierte que los mestizos y lanudos «nunca debe ser de color blanco, sino negro, pezo o brazado; y ninguno bermejo.»

• Nes Ordenances Conceyiles d’Arenas de Cabrales del añu 1726, nel so Capítulu 12, recuéyese cómo s’escoyíen ente tolos llabascos a cuatro d’ellos pa berrones.

Na maor parte de les parroquies d’Asturies, yá dende’l sieglu XVIII, les Xuntes Vecinales dictaben normes sobre los gochos pa que foren torgaos y asina nun fozaren pel monte. A la xente que nun cumplía estes normes, poníense-yos bones multes.

• En 1805 Francisco de Paula Caveda y Solares, fae la so Descripción geográfica del Concejo de Villaviciosa, onde espéyase la importancia que tenía nesta dómina pa conceyos como Villaviciosa, el gochu celta, del país, o Chambergu, qu’asina lu llamaben per Siero. Ye de soliñar el fechu que xentes «d’otros países» (castellanos ya extremeños) mercaren a cualisquier preciu «grandes piaras» d’ellos pa los llevar.

Seiqui dientru de les estremaes menes qu’inda güei amuesa «el gochu ibéricu», al traviés d’ún analís del so xenotipu, atopemos anicios de gochu celta que remanecen d’aquestes ventes feches n’otros sieglos col guru astur.

• En 1859 el Dr. Pascual Pastor y López, espubliza el so llibru tituláu Apuntes sobre la Fauna Asturiana; al falar del gochu diz:

«Sus scropha, vars. Domesticus: Gochu, Cucho, raza jareña. Nuna hai familia nes aldegues que nun crie un par d’ellos, a lo menos. »

• Félix d’Aramburu ya Zuloaga, na so Monografía de Asturias, espublizada n’Uviéu en 1898, recueye un ciensu nesi añu de 134.955 exemplares en tol Principáu.

• Nel sieglu XX, ya hay estudios que falen más detallao de les característiques morfolóxiques de estos gochos y su adautación a la cría en extensivo, así en 1917 Santos Arán nel so tratáu «Ganado de cerda. Explotación e industrialización del cerdo», diz que la raza principal ganadera de porcino asturiana ta formada por animales de castra céltica de color prieto y con excelente carne. La so descrición morfolóxica fala de animales de gran tiesta, oreyes per allargaes prolongadas y cayíes y empobináes p’alantre, güeyos pequeños y brillosos, capa color prieto y pelo no muy llargo, llombu daque enarquiáu, cuerpo aplanáu, y pates llargues.

• Na Topografía Mélica del Conceyu d’Illas plumiada en 1923, espécyase que’l gochu de la redolada tien la pelame prieta ya peza, dándo-yos el nome de teberganos a estos que son brazalbos. Los llabascos d’añu en tando cebaos algamen un pesu de 160 Kg.

• Na so obra Zootecnia especial. Etnología compendiada, espublizada en 1944, Aparicio G. fala de la Raza Asturiana:

«En la región asturiana, en relación con su total superficie y en cuanto al ganado porcino se refiere, una de las más intensamente pobladas en España, contribuyendo a ello su próspera industria chacinera, incrementada a favor de la calidad de sus productos, jamones especialmente, reconocidos como de alta calidad.

Esta densa población porcina, distribuida en la totalidad de sus partidos judiciales, pertenece desde antiguo a un tipo combinado, formado a base de la unión entre los tipos ancestrales Céltico e Ibérico; del primero, posee su trono alargado de costillares aplanados, dorso abovedado y grupo esencialmente inclinada con nacimiento bajo de la cola; corresponde en cambio al tipo ibérico, su cabeza francamente cónica de perfil subcóncavo y orejas de tamaño más reducido y en alero, sus extremidades fuertes y acortadas y so coloración negra, con piel revestida de cerdas.

Aparicio, seiquí por nun decatase, o quiciabes por unun lo saber, diz que’l pelaxe prietu solmente lu tien el gochu ibéricu, nun siendo asina por indagüei el gochu d’aniciu celta lu caltién, mesmo en Portugal (los de mena Beiroa: «Pretos sao pela maior parte os bísaros do noso país... ») qu’en Galicia (mena Carballina) que n’Asturies. Poro fala que la castra asturiana pertenez a un tipu combináu, formáu a base de la xuntura ente los tipos ancestrales célticu ya ibéricu, xuntura que anguaño y en base a estudios fechos con marcadores somáticos podemos decir que nun existe, siendo la ibérica y la céltica dos estirpes nidiamente separtaes.

• En 1947, Fernando Alburquerque asoleya’l so llibru La Riqueza en la Mano. El Cerdo. Cómo se ganan cinco mil duros en seis meses. Nesti trabayu espublízase un grabáu d’un gochu de Raza Asturiana; nelli destaquen les sos llargues oreyes, llombu encumáu ya rau ensin fer redolinos. L’autor descríbelu asina:

«Dentro de las razas indígenas y rústicas, nosotros tenemos muy buenos cerdos, y en Asturias hay un cerdo negro productor del famoso jamón serrano, delicia de los gourmands españoles. Se les cría, como en Extramdura, al aire libre. »

Les estadístiques oficiales dábenmos en 1955, pa tol Estáu, un ciensu de 224.000 goches paridiegues pertenecientes al tueru célticu. En 1970 estes cifres amenorgaren a 94.000 exemplares, baxando en 1974 a 42.000, pa desapaecer dafechu de los ciensos del Ministeriu d’Agricultura en 1978.